كشف أسامة نبيه نجم الزمالك ومنتخب مصر الأسبق عن تلقيه دعوة إفطار من جماهير القلعة البيضاء اليوم بعد انتهاء الأزمة بينه وبينهم مما يعكس رغبة الجمهور في إعادة التواصل مع أحد رموزهم بعد فترة من التوترات التي سببتها رحيل ابنه يوسف عن النادي.
وقال أسامة نبيه الذي يحل ضيفاً على برنامج “النجوم في رمضان”: “الجمهور عندهم حق وكانوا زعلانين منه بسبب رحيل يوسف ابني عن نادي الزمالك، ومهما قولت قصة الموضوع دا، فيه تفاصيل كتير لكن مش هتوصل زي ما أنا عايز”
ويضيف: “يوسف عقده انتهى وحاولت أتكلم مع المسئولين قبل فترة الفراغ الإداري اللي حصلت، وقلت إن عقده مش مناسب ليه والعرض اللي اتقدم لينا كان ضعيف، بس ملقتش أي رد فعل، وجمهور الزمالك زعل مني، بس الحمد لله بعتولي دعوة فطار اليوم في المريوطية والحمد لله رايح”
وتابع: “ابني ليه وجهة نظر وليه شخصية، بيشاركني الرأي بس القرار في النهاية هو اللي ياخده، ولو رجع بيا الزمن مكنتش هوافقه في الرحيل عن الزمالك، لكن قدر الله وما شاء فعل، لسه الكورة فيها كتير، واللي بينا وبين الزمالك كبير”
وأكمل: “أتمنى يوسف يرجع الزمالك، ولازم يشتغل على نفسه ويرجع يوسف بتاع زمان وعنده الفرصة حالياً في زد عشان يرجع تاني”
أسامة نبيه: استعجلت في الظهور التليفزيوني بعد اعتذاري عن الاستمرار مع منتخب الشباب
فى السياق ذاته، يرى أسامة نبيه نجم الزمالك ومنتخب مصر الأسبق أنه استعجل في الظهور التليفزيوني عقب تقديمه اعتذار عن الاستمرار مع منتخب الشباب بعد المشاركة في كأس العالم، وقال أسامة نبيه: “كلفت من هاني أبو ريدة في ديسمبر 2024 بتولي مسئولية تدريب منتخب الشباب وتوليت المسئولية فعلاً في فبراير 2025 وحتى يونيو 2025، يعني شهور ورحلة قصيرة والأمور مكنتش كويسة، فقررت الاعتذار بعد نهاية كأس العالم ودا طبيعي عشان أرفع الحرج عن مجلس الإدارة”
ويضيف: “كنت عامل برنامج مدته سنتين ونصف وفاكر أن الدنيا هيكون فيها استقرار زي فترة وجودي مع المنتخب الأول لكن دا محصلش، وأي جهاز عشان ينجح لازم يكون عنده استقرار”
وتابع: “مش هنكر إني استعجلت في الظهور التليفزيوني بعد رحيلي عن منتخب الشباب، بس برضو كلامي اتقطع وخرج للناس بطريقة تانية”